KUCHING: Ninting taun kita meda mayuh artis Dayak baru lalu tu pengerembai ke manah ba pengawa ngemansangka lagu-lagu Iban, Bidayuh enggau Orang Ulu.Tang kemaya hari tu mega mayuh bansa bukai baka Melayu tauka Cina rindu belagu sereta mendingka lagu-lagu Dayak. Tu sigi ngayanka konsep 1Malaysia.
Chermin Gerempung Artis enggau Pemusik Dayak (DAMA) Snowdan Lawan madah ba taun 2008 aungerah DAMA diatur laban deka meri basa, beterima kasih sereta meri kelala ngagai raban artis Dayak bai ke sida nya orang lama tauka baru ba industri musik Dayak ketegal pengawa sida ba dunya pemerindang.
Maya nya penemu enggau runding datai ari siku pemesai ke berani megai tanggung pengawa ngerembang pejalai dunya pemerindang artis Dayak, lalu orang nya ukai orang bukai ke sigi selalu tampak rita, iya nya Dato Sri Celestine Ujang (kediatu mega Ujang nyadi Penyanding Penemu ngagai gerempung DAMA).
“Aku ngarapka semua artis, pemusik sereta peminat musik Dayak deka terus nyukung gerempung sereta industri musik Dayak kitai, lalu ngambika kitai ulih nyingkang ngagai renggat ke tinggi agi.“Aku minta artis Dayak masuk nyadi kaban gerempung DAMA ngambika kitai ulih sama-sama nirika enggau tegap industri musik Dayak kitai,” ku iya.
Kelimpah ari nya mega Snowdan ti mega Kaban Kunsil Nengeri (ADUN) Balai Ringin madah pengawa DAMA ngeringka industri musik Dayak baka tu patut diteruska jemah ila ke tau mega dijadika peransang ngagai komposer enggau penyanyi ngambika sida terus ngeluarka lagu ke bekualiti.
Taja pan kemaya hari tu bemacham-macham tiun lagu ke bisi didinga kitai baka tiun pop, hip hop enggau Indi, mayuh lagu Dayak mega sama-sama ngaga chura ba dunya pemerindang.
Mayuh lagu Dayak diatu muntang digiga baka ba laman web youtube.com kelimpah ari industri musik Dayak kebendar udah lama bisi ba dunya pemerindang iya nya berindik ari urung taun 1950 kelia ke belabuh ngaga lagu tiun ‘keroncong’ enggau ‘asli’.
Entara raban artis lama Iban ke sigi tebilang kelia ianya baka niang Michael Jemat, Wilfred Vincent Ragam, Esther Bayang, Pauline Linang, Richmond Alan Morshidi, Christopher Kerry enggau mayuh sekeda penyanyi lama kelia ke enda ulih disebut ditu.
Enti deka dibanding enggau kelia, diatu artis-artis Dayak rindu agi deka ngemai lagi ngena tiun dangdut, joget enggau balada. Bedau tentu lama tu tadi bisi kumpulan pemusik ke udah ngemai ubah enggau ngena tiun Hindi ba lagu Iban.
Taja pan pemayuh artis baru ke dipadah baka kulat ke tumbuh udah abis ujan, industri musik Dayak agi jauh kena tinggal.
“Patut ulih disebut kitai lagu Dayak semina tebilang ba Sarawak tu aja. Taja pan nyauka 50 taun tu udah bisi ba menua kitai tang pengarap kitai deka gah agi baka lagu Melayu, agi jauh.
“Pengawa kita ke deka majak ngemansangka lagu-lagu Dayak kitai datai ba renggat nasional enda kala enda diangkatka kitai laban kemaya hari tu kitai diberi peluang mantaika industri musik Dayak ditabur nengah Musik Aktif ba arus Astro 108 ti dikemutar setengah jam ulih RTM tiap hari Minggu.
“Kediatu DAMA benung berunding tauka baum enggau TV3 deka mantaika induistri musik Dayak ba sekeda program khas sida iya. Aku empu udah betemu enggau Produsa TV3 ba program Malaysia Hari Ini (MHI), ba TV9 program Nasi Lemak Kopi O sereta program merindang hati Melodi,” ku iya.
DAMA tu ku Snowdan, ukai semina alai ngempung artis menua tu tang iya mega nyadi palan ke betul alai palan meri kelala sereta meri terima kasih ke sukung penyanyi enggau komposa lagu ke ngeringka musik Dayak pengelama tu.
“Industri musik kitai ke sigi udah lama bepalan ba menua tu begunaka ubah kena beratika iya terus diterima orang mayuh,” ku iya.
DAMA deka ngatur malam Anugerah Musik Dayak (AMD) bulan Oktober tu ila. Tu entara pemerat pengawa DAMA meri basa ngagai artis Dayak ke udah mujur ba dunya pemerindang.
Baka anugerah ke kala diatur ba taun 2008 tu suba, sekali tu iya diatur lain mimit laban bisi ubah ke patut ngagai industri musik Dayak kitai.
Taun tu DAMA deka mantaika 10 kategori enggau 23 buah mangkuk anugerah.
“Malam anugerah tu besai reti sereta ‘beperestij’ alai kami ngemai mayuh artis ba Malaysia enggau Indonesia sama datai ngeramika industri musik kitai,” ku Snowdan.
Bedau tentu lama tu tadi, chermin DAMA enggau bala komiti iya bisi nemuai ngagai Anugerah Industri Musik (AIM) ke-17 ke diatur ba Putra World Trade Centre (PWTC) Kuala Lumpur, lalu ari atur pengawa nya mayuh utai ke udah dipelajar sida iya bakani deka ngatur siti industri musik enggau chara ke tinggi sereta manah.
Nya alai ku Snowdan, bala artis Dayak dikingatka ngasuh nganjung pom chalun sida iya sebedau timpuh tutup 31 Julai tu ila.
“Kami deka napis sereta deka ngemutarka semua pom chalun nya ila dalam bulan Ogos enggau September sebedau malam AMD ba bulan Oktober.
“Tang sebedau nya, bala artis patut masuk nyadi kaban DAMA dulu sebedau sida ulih bepekit maya AMD nya ila,” ku iya.
Pom masuk nyadi kaban tau diambi ari opis DAMA ba Kuching, ba komiti sereta pengari kami ba Sibu, Bintulu enggau Miri tauka diambi terus ari laman web DAMA iya nya ba www.dama.my
Entara spunsa malam bejadika DAMA hari Lima minggu siti nyin tadi, Carlsberg, Celcom, RTM, CatsFM, M&D World of Cars enggau sida bukai.
Tiada ulasan:
Catat Ulasan