Album ‘Panjai Begulai’ Clemence Joy’s dipenyadi ba Sarikei

 SIBU: Penanyi Iban tebilang Clemence Joy’s deka bejadika album kebaru iya kena hari Enam tu (pagila) ba pasar Sarikei.
Pengerami nya bejadika album ketiga iya tu ke dikumbai Panjai Begulai deka diatur ba Makit Sentral Sarikei berengkah pukul 2 nyentukka 5 lemai.
Menteri Pemansang Pengawa Rama enggau Kandang Menua, Dato Sri Wiliiam Mawan Ikom dipebasa bejadika pengerami tu pagila.
Nitihka dipadah Clemence, serak tu iya ngaga pemutus deka bejadika album iya ba Sarikei laban kenu ku iya bala peminat mayuh datai ari menua sitak tengah.
“Dua iti album keterubah aku suba dipejadika ba Sibu. Nya alai serak tu aku milih Sarikei alai bejadika album ketiga tu ngambika bala peminat baka ari Saratok, Julau, Pakan, Bintangor, Sibu enggau mayuh menua bukai ulih datai maya tu,” ku iya madah ngagai pengarang berita, kemari.
Madah ngagai pengarang berita, kelimpah ari pengerami bejadika album nya, mensia mayuh ke bisi datai mega deka diperindang kunsit ‘live’ ari iya.
Kunsit tu diatur begulai enggau The Joy’s Band ti disempulang Walter Sela, Ricky Jay, Naen Legacy, Jackson Dana (JD), West, Raymond Adam enggau Samuel Bayang.
“Aku arap mensia mayuh kelebih agi bala peminat aku anang muai awak tu lalu maya tu mega kita tau meli VCD enggau CD baru aku. Nyadi kedai endur nyual VCD enggau CD tu berengkah dibuka ari pukul 9 pagi,” ku iya ti tebilang enggau lagu Entara Dua.
Pengerami tu mega diperambu deka digulu beberapa iku artis Iban kebukai lalu Clemence deka dibai enggau mutosikal besai ngelinggi pasar Sarikei apin pengerami nya dipejadika.
Berindik ari nya, mensia mayuh kelebih agi bala ba Sarikei dilalau anang muai awak datai ngulu pengerami tu kelimpah ari tama ngagai palan nya enda bebayar.
Clemence Joy’s artis peranak Sibu sebedau tu bejadika album Nadai Penanggul ba taun 2008 lalu ditangkan Anang Buai Batu taun siti suba.
- UB

Tiada ulasan:

Related Posts Plugin for WordPress, Blogger...