Sarawak Suntuk 68 pengajar Jaku Iban


MERI BASA: Fatimah nerima pemeri ari UPSI, Prof Madya Dr Sophia ditu, kemari.

93 pengajar enda tetangkupka 55,000 nembiak ti ngambi subjek tu
KUCHING: Sekula ba menua Sarawak diatu betapi enggau suntuk pengajar Jaku Iban dikena ngajar urung seraban 55,000 iku nembiak ti nyengkaum sekula primari enggau sekondari ke ngambi subjek jaku bansa asal menua tu nya.
Menteri ba Opis Kepala Menteri Datin Fatimah Abdullah madahka 93 iku pengajar Jaku Iban ke bisi diatu enda tetangkupka pemayuh nembiak ke ngambi pelajar nya.
“Nitihka statistik ari opis pelajar, penyampau pengajar Jaku Iban  nyengkaum sekula primari enggau sekondari iya nya 93 iku, diatu kitai agi suntuk 68 iku pengajar jaku tu.
“Lalu penyampau nembiak sekula primari ti belajarka Jaku Iban iya nya urung 32,000 iku enggau sekula sekondari urung 23,000 iku,” ku Fatimah ba aum pengarang berita maya iya ti nerima penemuai raban ari Universiti Perguruan Sultan Idris (UPSI), Perak ba opis iya ditu kemari.
Ku Fatimah sekula ti bedau sereta deka nyadika jaku tu siti subjek elektif patut ngenataika peminta tumu agi ngagai opis pelajar.
Iya madahka tu kena nentuka pengajar ti ngajar Jaku Iban bisi.
“Enti sekula bisi peminta Jaku Iban nyadi subjek elektif, sekula patut ngenataika pekara nya ngagai Opis Pelajar ngambika opis nya ulih ngatur bekaul enggau pengajar.
“Enti dipadah tumu, kitai ulih ngelatih pengajar ke endang ngajar jaku Iban tauka ngambi pengajar bahasa diasuh ngajar jaku nya.
“Laban enti dekaka Jaku Iban sebagi ari subjek elektif, sekula nya patut bisi pengajar. Enti nadai pengajar kitai nadai ulih ngajar Jaku Iban,” ku iya.
Nya alai kena napi penanggul suntuk pengajar ku iya, UPSI bisi numbuhka Fakulti Bahasa Iban dibaruh Bahasa dan Kesusteraan Melayu.
Diatu Fakulti Bahasa Iban UPSI bisi 20 iku siswazah ti keterubah ngambi program nya lalu dipelabaka deka tembu belajar tiga taun ke deka datai.
Kelimpah ari nya, Institusi Perguruan Rejang bisi 25 iku ngambi Program Pensiwazahan Guru Bahasa Iban, lalu sida tu deka ngajar ba sekula primari.
Kursus Dalam Perkhidmatan pengelama enam minggu bisi dipejalaika Institut Perguruan Kampus Miri, diatu bisi 30 iku ngambi kus Jaku Iban.
Fatimah bejaku baru madahka Kurikulum Standard Sekolah Rendah berengkah taun 2011 iya nya Jaku Iban nyadi subjek elektif ti enda tau enda dipelajarka sebaka enggau Bahasa Arab, Bahasa Cina, Bahasa Tamil, Bahasa Semai, Bahasa Kedazan Dusun.
Diatu ba Sarawak sepenyampau 641 ari 1,261 bengkah sekula primari ke ngambi Jaku Iban.
Pelajar Jaku Iban bisi diajar ba sekula primari enggau sekondari berengkah ari Primeri Satu ngagai Pom Lima.
Jaku Iban berengkah diajar ba sekula primari ari taun 1957, lalu sekondari ari taun 1963.
“Diatu, Jaku Iban diperambu deka diajar ba Pom Enam,” ku Fatimah.
Temuai ari UPSI iya nya Sapit Naib Canselor (Pemansik enggau Inovasi) Prof Dr Noraini Idris, Pengarah Pusat Penyelidikan Perkembangan Awal Kanak-Kanak Prof Madya Dr Sopia Md Yasin enggau Pensyarah (Jaku Iban) Fakulti Bahasa dan Komunikasi Dr Rosline Sandai.
- Diambi Ari Utusan Borneo

Tiada ulasan:

Related Posts Plugin for WordPress, Blogger...