KUCHING: Previu Anugerah Juara Rentak Ruai (AJARR) ke-5 deka betemu enggau bala peminat sida iya ba Bandar Sibu kena ujung minggu tu ila.
Previu tu deka mantaika sekeda finalis baka James Ruai, Urai, Clemence Joys, Hailey, Ebau, Stevenson enggau Masterpiece sereta komposer enggau penyanyi Iban tebilang, Nai Dinamik sama deka enggau ngeramika atur pengawa nya.
Pengatur pengawa tu, Cats FM naga bala peminat penyanyi Iban sereta AJARR ke-5 tu ila deka narit orang mayuh ngagai Wisma Sanyan kena 30 April enggau 1 Mei belabuh ari pukul 11 pagi ngagai 5 lemai.
Kelimpah ari bekelala enggau raban artis Iban, bala peminat mega tau bekelala enggau raban personaliti gawa ba Cats FM kelebih agi sida ke suah endar didinga ba program Iban baka Ivy, Ijau enggau Freddy.
Entara sekeda program ke bisi disengkaum ujung minggu tu ila nyengkaum pengawa belagu ulih raban artis, pengawa betemu enggau peminat sereta mayuh macham agi pekit ke nyendiaka mayuh macham perais.
Rayat Sibu mega bepeluang ngulihka tikit pechuma meda ‘final’ AJARR ke-5 ke deka diatur 21 Mei ba Stadium Perpaduan Petra Jaya, Kuching.
Tikit meda ‘final’ AJARR ke-5 bisi mega dijual ba kaunter kededua hari previu ke dibuka ngagai orang mayuh ba Wisma Sanyan.
- Diambi Ari Utusan Borneo
Tiada ulasan:
Catat Ulasan