DAMA benung merambu ngaga ‘Borneo Rock Ethnic’

KUCHING: Gerempung Artis enggau Pemuzik Dayak (DAMA) diatu benung merambu deka ngaga siti kompilasi album lagu bechampur, ‘Borneo Rock Ethnic’ begulai enggau pemuzik tebilang menua tu baka Man Kidal, Ramli Sarip, Amy Search enggau raban pemuzik tebilang ke bukai.

Ku Chairman DAMA, Snowdan Lawan madahka projek kerejasama tu siti album ke deka mantaika pemuzik ari menua Sarawak tu empu.

“Tu siti album ke deka mantaika pemuzik menua kitai empu baka Jerry Kamit, Band Masterpeice, Heavens enggau penyanyi ke bukai.

“Ambika chunto lagu Jerry Kamit deka diiring Man Kidal bemain gitar, tauka lagu sekeda deka diiring Ramli sarip, enggau sida ke bukai.

Reti nya muzik sida disegulaika enggau ‘genre’ baru kemaya hari tu,” ku iya madah ngagai bala pemberita lebuh dikerandau begulai enggau iya empu ti mega Kaban Kunsil Nengeri (ADUN) Balai Ringin.

Ku Snowdan, ba album 20 iti lagu tu ke dipelaba deka digaga hujung taun tu ila deka mantaika muzik Sarawak, besaup enggau pemuzik ari semenanjung.

“Kami mega nyangka deka nyengkaum kompeni besai baka Celcom, Firefly enggau sekeda kompeni besai bukai bekerejasama enggau kami tauka nyadi spunsa, laban penembu album tu ila, tiap CD deka dijual enggau rega RM30 siti, ke ditaga bisi RM3 juta bepanggai ba penyampau album tu deka dijual ukai semina ba Sarawak tang mega deka dijual ba semenanjung,” ku iya.

Berindik ari penguntung ke ditaga nya, Snowdan madah enti projek tu mujur ila, nyangka RM1 juta deka dikena ngaga sekula muzik diungkupka bala nembiak menua tu ke bisi pengerindu nebah muzik sereta deka ngambi pelajar tu.

“Sekula muzik tu ila sebuah sekula ke ‘prestij’ lalu manah ngagai sida ke bisi pengerindu ba muzik.

Pengawa DAMA ila deka ngiga nembiak ke bisi pengelandik ba muzik ke deka dipasuk ngagai sekula muzik tu,” ku iya.

Tambah mega bala pengajar ke ngajar nya ila ku Snowdan, sigi orang ke bisi pengelandik dalam muzik.

“Baka kediatu pemuzik tebilang baka Jerry Kamit, enti nitih siku pemuzik ke udah datai ba renggat entarabansa tang nadai diangkatka orang.

Nya alai, ngembuan sekula muzik tu ila, nyangka Jerry ulih nyadi pengajar, lalu ditambah agi enggau album Borneo Rock Ethnic ke deka ngempung Jerry enggau Man Kidal kini,” ku iya.

Udah bejadika album tu ila, nyangka DAMA deka bejalai ngaga ‘Roadshow’ sida iya ngangkatka album enggau sekula muzik tu sekali.

- UB

Tiada ulasan:

Related Posts Plugin for WordPress, Blogger...