Genggam Jariku nyaup nyagu penuduk Gabriel ba AMD 2012

SAMARAHAN: Anugerah Muzik Dayak (AMD) 2012 ti diatur di DeTAR Putra UNIMAS malam ensanus ke ngungkupka 20 bengkah anugerah ngangkatka nama Gabriel Fairuz Lois nyadi artis baru Dayak ke pegari kemaya haritu.

Gelar Best New Dayak Artiste, Best Male Artiste enggau Album of The Year (Iban) nengah album Genggam Jariku chukup nyaguka Gabriel ba penuduk ti pemadu tinggi dalam dunya pemerindang Dayak.

Artis ke dikerindu semua Melissa Francis nitihka sangka semua raban orang ke rinduka muzik alai iya mujur ngerebut gelar Best Female nengah lagu Beserara Enggau Ai Mata.

Melissa mega diangkat nerima gelar Best Balad Artiste ke alai leka lagu Album Beserara Enggau Ai Mata ti mega nerima gelar leka lagu ke pemadu manah-Best Lyrics.

Pemenang gelar bukai malam nya ngangkatka Sada Ati ari band Heaven nerima gelar Best Dayak Song (Iban), Bintue Taap Bauh ari Romina Grey Melvin (Bidayuh) enggau Mapuh Tageng Taji ari Rosiana Urai ungkup Orang Ulu.

Band Taju Remaong nengah Album Taju Remaong dipilih nerima gelar Best Group ngalahka 10 buah band bukai nyengkaum band ke udah pegari, Masterpiece enggau Ethnic Transmissions.

Taja pia, Ethnic Transmission dipilih nerima gelar Best Music Arrangement nengah Album Ethnic Transmission.

Lagu popular Telih Di Ati Bedarah Dimata ngangkatka Steven @ Stevenson nerima gelar Best Rock Artiste AMD 2012.

Anugerah malam nya mega ngangkatka penanyi baru ke majak popular, Rannee Pat  nerima gelar Best Pop Creative Artiste nengah Album Tua Semina Bepangan.

AMD 2012 ngangkatka Edward Sayu nengah Album Snipers nerima gelar Album of The Year (Bidayuh) ke alai Album The Best lagu Kenyah Vol 3 menang anugerah Album Of The Year (Orang Ulu).

AMD 2012 ke diatur tiap dua taun nyendiakka siti anugerah ke dikumbai “Dama Special” ke alai band (Orang Indu) ke ditumbuhka ba taun 1996 ‘Candy’ diangkat nerima gelar nya.

Popular nengah lagu ‘Akan Ku Tunggu’, Band Candy ke dirikut dalam Malaysian Guiness Book of Record nyadi raban band (Rock) orang Indu keterubah ditumbuhka di Malaysia lalu mengkang belagu maya ke diatu ke alai mayuh agi lagu raban nya dijual nengah on-line.

AMD 2012 mega meri basa ngagai orang lama ti udah meri pengengkah dalam industri muzik Dayak nengah gelar ‘Life Time Achievement’.

Niang Micheal Jemat diangkat nerima gelar nya ungkup bansa Iban, Julia Empaying (Bidayuh) enggau penebah sape Ukum Mering nerima ungkup bansa Orang Ulu.

Panggau pemerindang AMD 2012 malam nya dipungkal raban artis lama ti mai lagu popular sida iya lalu nya nyengkaum Datin Senorita Linang, Christopher Kelly, Mike Rantai sereta ke bukai.

Band popular ari Semenanjung Malaysia ke mai lagu Iban ‘Sulu Serata Menua’ enggau Jimmy Pelikat ke popular nengah lagu Anak Kampung bela diundang ngerami malam nya.

- Utusan Borneo 26/11/2012

Tiada ulasan:

Related Posts Plugin for WordPress, Blogger...