Program SDNU Ngatur Pengawa Ngerejista Nembiak Dayak Ngisi SPA Ukai Umpan Pengawa Bepilih

KUCHING: Penyakah Gerempung Bansa Dayak Sarawak (SDNU) ngatur pengawa ngerejister urung 100,000 iku nembiak Dayak ba peminta pengawa puang di opis perintah besai ukai umpan pengawa bepilih tang dikena nyaup Komisyen Pengereja Pengawa Perintah (PSC) ngenyukupka penerang dalam sistem.

Nengah atur pengawa SDNU nya mega, penemu ke sengapa ngumbai bansa Dayak enggai mangku pengawa perintah, ulih diseliah.

Lebuh berandau seraya merarau begulai enggau pengarang berita sereta kaban gerempung nya kemari, mandal presiden SDNU nya Anthony Banyan madah, kenyau petengan bulan November tu tadi ke berengkah di Pakan, sida mujur ngatur pengawa ngerejister nembiak bansa Dayak ba sepuluh bengkah kandang menua.

Nitihka penerang Anthony, mayuh agi nembiak bansa Dayak direjister, besai agi awak sida teulihka pengawa ba opis perintah besai. Penemu PSC ke minta 100,000 iku, nya semina ke peransang sereta pelasar SDNU ba atur pengawa ke sebaka jemah ila.

“Perintah nengah program tu sereta saup SDNU ngenyakahka diri ngerejister nembiak bansa Dayak ngisi peminta ba pengawa puang. Mayuh agi nembiak minta, besai agi awak sida bulih pengawa ba opis perintah besai,” ku iya.

“Kelimpah ari nya, pengawa ke diatur SDNU tu ukai umpan pengawa bepilih tang sebengkah ari jalai perintah nyaup raban bansa Dayak,” tandu iya.

Anthony mega ngarapka nengah program tu runding nembiak bansa Dayak tau tebuka.

SDNU nengah saup semua lebih agi ketuai, pengari rayat sereta raban media berasai gaga bepun ari pemujur atur pengawa sida ba serata nengeri tu.

Gerempung tu mega ke disaup PSC berengkah ngatur pengawa ngerejister nembiak bansa Dayak kena 15 November di Pakan sereta pengujung tu tadi kena 23 Disember di Selangau. Entara timpuh nya mega bisi diatur di Sri Aman (16 Nov), Skuau (18 Nov), Saratok (1 Dis), Bintulu (12 Dis), Kanowit (15 Dis), Betong (16 Dis), Kapit (18 Dis) sereta Sibu (22 Dis).

Bela bisi nyaup SDNU enggau PSC ngereja pengawa nya Dayak Bidayuh National Association, Orang Ulu National Association, Sarawak Dayak Graduates Association enggau  Sarakup Indu Dayak Sarawak.

- Diambi Ari Utusan Borneo

Tiada ulasan:

Related Posts Plugin for WordPress, Blogger...